ދައުލަތުގެ ބެލުމުގެ ދަށުގައި ތިބޭ ކުދިން
ދައުލަތުގެ ބެލުމުގެ ދަށުގައި ތިބި ކުދިންނަކީ ރައްކާތެރިކަމުގެ ކަންބޮޑުވުންތަކާ ނުވަތަ އެހެނިހެން ސީރިއަސް ހާލަތްތަކާ ގުޅިގެން އާއިލާއާ އެކު ރައްކާތެރިކަމާ އެކު ދިރިއުޅެވެން ނެތް ކުދިންނެވެ. މިފަދަ ހާލަތްތަކުގައި، އެ ކުދިންގެ ސަލާމަތާއި ރައްކާތެރިކަމާއި ދުޅަހެޔޮކަމާއި ތަރައްޤީ ކަށަވަރުކުރުމުގެ ޒިންމާ ނަގަނީ ދައުލަތުންނެވެ.
އަޅުގަނޑުމެންގެ އެންމެ އިސް އަމާޒަކީ ކޮންމެ ވަގުތެއްގައި ވެސް ކުއްޖާގެ އެންމެ މަތީ މަޞްލަޙަތަށް ޢަމަލުކުރުމެވެ. މީގެ ތެރޭގައި ގެއްލުމުން ރައްކާތެރިކުރުމާއި، ހަމަޖެހުން ކުރިއެރުވުމާއި، ކޮންމެ ކުއްޖަކު ޞިއްޙަތު ރަނގަޅު އަދި ޤާބިލު މުޖުތަމަޢުގެ ފަރުދެއްގެ ގޮތުގައި ބޮޑުވުމަށް އެހީތެރިވުން ހިމެނެއެވެ.
އާއިލާތަކާއި، ބެލެނިވެރިންނާއި، މުޖުތަމަޢުގެ ބައިވެރިންނާއި، ޢާންމު ރައްޔިތުންނާ ގުޅިގެން މަސައްކަތްކޮށް، ދައުލަތުގެ ބެލުމުގެ ދަށުގައި ތިބި ހުރިހާ ކުދިންނަށް ރައްކާތެރި، ޝާމިލު، އަދި އޯގާތެރި މާޙައުލެއް ބިނާކުރުމަކީ އަޅުގަނޑުމެންގެ ލަނޑުދަނޑިއެވެ.
